Era Arturada.

Non pensatz que mos referim a auta idèa absurda d'Artur Mas, volem parlar dera "crisi" immobiliaria que comencèc enes Estats Units e que ja pòrte un temps en tot afectar ar Estat Español. Bèri ingenus se n'arrien des immobiliaries e les acusauen d'especuladors. Dilhèu an un shinhau d'arrason, encara que generalisar tostemp ei dolent.
Mès, des conseqüéncies dera arturada dera venta d'estatges non se ne sauve arrés. Un clar exemple ei eth problèma que s'a creat ena Generalitat ath deishar d'ingresar 1.140 milions d'èuros mens deth que auie previst. Un aute exemple ei era precipitacion damb era qu'er Ajuntament de Vielha apròve plans parciaus en tot demorar que sone era campana e pogue tornar a auer ingrèssi coma aguesti darrèri ans. Era situacion en consistòri comence a èster grèu: deth Superavit de 400 milions de pessetes que deishèc eth equip d'Unitat d'Aran, ja non demore arren; de hèt coma non entren en es pròplèus mesi ingrèssi en concèpte de licéncies, veiram coma s'afronten aguesti pròplèus tres ans.
Semble èster qu'eth equip de govèrn confie en es subvencions dera Generalitat e er Estat, mès ath vedesse rebaishadi es ganhs d'aguestes dues administracions, non credem que n'arriben guairi, alavetz serà eth moment de trapar a mancar tot çò que s'a honut enguan.