Desvariant

Èm a punt d’assistir a un des mès grani errors de planificacion de Vielha e Mijaran. Er equip de govèrn de manèra unilaterau a decidit eth nau traçat dera variant dera carretera C-28, ne mos an informat as ciutadans ne ath grop d'Unitat d'Aran, e çò qu'ei mès grèu: non an valorat d’autes alternatiues.

Era solucion prepausada non supause cap desliurèr entà eth trànsit que ven pera carretera N-230 e non ei pas ua solucion sostenible ambientauments. Ei mès, serà era prumèra variant des darrèrs ans que passe pendent mès de 1 quilomètre per zòna urbana.
Entà agreujar mès era situacion es coches passaràn a escassi 10 mètres dera escòla mairau e dera nau zòna esportiua, sense condar era afectacion as viuendes de Proteccion oficiau e d’auti abitatges.

Eth futur deth nòste municipi aurie de passar per ua variant que dèsse solucion ath transit puntuau en epòques d’afluéncia toristica e ath transit pesat que quauque dia circularà pera C-28. Per qué non ac estudiam entre toti?

Era solucion dilhèu passarie per ua via semisosterranha qu’evitarie eth fòrt impacte ambientau que supausarà eth traçat prepausat per Convergència e PP.

Çò de mès estonant ei qu’açò non s’a pas demanat, non sabem pas es rasons, mès ei paradoxau que dempús se demane un tunèl de 8 quilomètre ena carretera N-230.

Aute punt preocupant ei que aguesta variant siguec prepausada en es ans 80, descartada pendent fòrça ans per govèrns de Convergéncia, e qu’ara s’impose per decret.

Ei fòrça frustrant èster en un Ajuntament estant era lista mès votada e que eth grop que governe se somete ar unic còsso que les da era majoria. Mès ei desesperant que prenguen decisions sense retorn des que ac van a patir toti es que vien darrèr nòste.

Ei eth moment dera movilizacion entà arturar aguesta bestiesa. O dilhèu pensatz que non ac cau?

Ei enes vòstes mans, nosati haram tot çò que sigue possible.