Bertrand

Miez sirventes vueilh far dels reis amdos,
Q'en brieu veirem q'aura mais cavailhiers
Del valen rei de Castella, n'Anfos,
C'aug dir qe ven e volra sodadiers.
Richarz metra a mueis e a sestiers
Aur e argen, e tens'a benanansa
Metr'e donar, e non vol sa fianza!
Anz vol gerra mais qe qaill'esparviers.

S'amdui li rei son prou ni coraios
En brieu veirem camps joncatz de qartiers
D'elms e d'escutz e de branz e d'arcos
E de fendutz per bustz tro als braiers,
Es arage veirem anar destriers,
E per costatz e per peichz manta lanza,
E gaug e plor e dol e alegranca.
Le perdr'er granz e.l gasainhz er sobriers.

Trompas, tabors, seinheras e penos
E entreseinhs e cavals blancs e niers
Veirem en brieu, qe.l segles sera bos,
Qes hom tolra l'aver als usuriers,
E per camis non anara saumiers
Jorn aficatz ni borjes ses duptansa,
Ni mercadiers qi venga dever Franca!
Anz sera rics qi tolra volontiers.

Mas se.l reis ven, ieu ai en Dieu fiansa
Q'ieu serai vius o serai per qartiers!

E si sui vius er mi grans benanansa,
E se ieu mueir er mi grans deliuriers.